bloggerads

Search This Blog

2/16/2012

大亂局 (轉載)

唐英年喺晚上八點幾食飯時間開嘅記招,將乜責任都推到佢老婆郭妤淺身上,由於唐英年啲「課外活動」太深入民生,郭妤淺個樣係唔掂都好,師奶聽到唐英年咁無膊頭,唔只鬧爆,當埋係陳健康、陳冠希都得,呢啲師奶大忌都唔知,唐英年一定玩完。
但有樣更詭異嘅事嚟係,北京唔表態挺梁振英,梁振英亦唔敢抽唐英年水。
梁振英唔敢抽水,因為佢唔知習近平返北京之後,會唔會成個核彈送到佢頭上。
本來喺習近平訪美期間搞埋啲咁嘅偷襲,知中共政治都知,你對手被毀滅你都唔會贏,因為呢啲趁阿頭外出搏懵嘅行為,俾你得手真係天下大亂,所以就算唐 英年瓜咗,習近平都已經唔一定會俾個位梁振英,最多推佢啲後備,本來應該用喺中央有急事果陣至用,但依家搞到要攞出嚟用嘅江湖救急人選,甚至推郭妤淺出嚟 選都得。
更大嘅問題,我都講咗n次,梁振英同薄熙來班友關係太密,而依家美國之音報導係,國務院啲官流出嘅source,王立軍有提供大量薄熙來謀反嘅情 報,而薄熙來謀反背後老闆係周永康,啲堅過石堅嘅黑材料,我睇唔係嚟自中聯辦班酒肉朋友,因為約道似係中聯辦鐵竇,呢鋪西環都被梁振英起尾注。如果梁振英 喺王立軍俾啲料上出現,或者佢啲老友喺王立軍俾啲料上出現,你估習近平會唔會俾梁振英選特首。加上揭黑材料咁揭法,支持唐英年後面班友驚你梁振英上台秋後 大算賬,仲唔趁你未選到特首做低你。
所以葉劉淑儀意圖搏懵,佢條友嘅戰術盤算勁就勁,可惜佢唔記得咗佢基本法廿三條果陣嘅表現呢。但依家情況好清楚,唐英年一連串膠到無朋友嘅事,只係一場江湖大廝殺嘅序幕,依家仲可以笑,遲啲大家諗吓可以點自保。url