秘書長一定係黨員做

Posted on March 18, 2012 by martinoei 黃世澤

梁慕嫻喺新書記者會，當眾推斷梁振英係地下共產黨，梁振英當然一味否認，但唔會夠薑去告梁慕嫻。因為梁慕嫻年資係司徒華果隻級數，如果梁振英敢郁梁慕嫻，佢唔知依家土共有邊啲有係梁慕嫻有關嘅話，恐怕佢死得好慘。
而梁慕嫻用梁振英做過《基本法》諮委會秘書嚟咬住佢地下黨身份唔放，亦好正路。大家要了解，中共係點玩殘蔣介石。
當年蔣公剿匪不力，唔係因為軍力差，而係太多共產黨人滲透咗入去，全部都係啲重要人物嘅秘書之類，結果呢啲友仔不斷幫國民黨倒米，幾強都倒。而中共正因以呢挺手段起家，所以喺中共裡面，秘書長一類人物，一定要係絕對可靠，黨紀郁到佢嘅人。咁除咗黨員，邊個可以被黨紀郁？
所以梁振英可以呃到啲唔熟中共黨史嘅真心膠，但知道中共歷史嘅人，就無幾個信梁生嘞。當然梁振英一定會否認佢嘅黨員身份，因為否認身份，係任務嘅一部分，認咗就玩完。